Iá, Memleket basshysy sol qıyndyqtardyń bárin eńserý úshin orasan kúsh-jiger jumsaǵanyna bizder, jýrnalıster qaýymy kýámiz. Mysaly, Qazaqstan Prezıdenti 2000 jyldary Astana qurylysynyń máseleleri jóninde aı saıyn derlik keńes ótkizetin. Jıyn barysynda árbir nysanǵa tartylǵan ınvestısııadan bastap, qurylys qaı deńgeıde júrip jatqanyn, qandaı kedergilerge kezikkenin ejiktep surap, týyndaǵan problemalardyń dereý sheshimin taýyp otyratynyn kóz kórdi. Elbasy tipti salynyp jatqan ǵımarattardyń syrtqy pishini men túr-túsine deıin nazar aýdardy. Qala ǵımarattarynyń óńi-túsi aq qar jamylyp jatatyn alty aı qysta da ádemi, ashyq, ajarly bolýy kerektigin udaıy aıtyp, qasbetti surǵylt túspen qaptaǵan merdigerlerge eskertý jasaýdan da jalyqpady.
Osyndaı yjdaǵattylyq pen qatań baqylaýdyń nátıjesinde qala qurylysy qarqyndy júrdi. Jazdyń jeldi kúninde shańytyp turatyn, ortalyq kósheleriniń ózinde jaýyndy kúnderi rezińke etikpen júretin laısań, keńestik úlgidegi eski Aqmola bas-aıaǵy 10-15 jylda zamanaýı
jańa qala – ajarly Astana bolyp qulpyrdy. Aýmaǵy 2-3 esege ulǵaıdy. Biraq álemniń keıbir astanalary sekildi beıbereket ósýge, aýa jaıylǵan jabaıy qurylysqa jol berilgen joq.
Qala taǵdyryna klımattyń da áseri zor. Elbasy muny da udaıy qaperinde ustady. Aýa raıy kúrt qubylmaly, qysy qatal, jazy ystyq, jeri sazdaýyt bolǵasyn, burynǵy Aqmolanyń aınalasynda kúnnen kóleńke, jelden qalqa bolarlyq jasyl-jelek joqtyń qasy edi. Nursultan Nazarbaevtyń orasan kúsh-jiger jumsap, jiti qadaǵalaýynyń arqasynda Astanany oraı jasyl orman beldeýi boı kóterdi. Qystyń da qytymyr minezi synyp keledi.
Elordasy eń aldymen turǵyndaryna jaıly, qonaqtaryna qyzyqty ári qolaıly bolýy kerek. Sondyqtan jańa standartpen jumys isteıtin saýda jelileri men oıyn-saýyq ortalyqtarynyń, álemdik deńgeıdegi qyzmet kórsetý talaptaryna saı keletin densaýlyq nysandary men qonaqúılerdiń, sport saraılarynyń qurylystaryna da basa nazar aýdaryldy. Iаǵnı, qala halqy úshin mádenı-áleýmettik, ekonomıkalyq mańyzy bar barlyq nysannyń alǵashqy tasyn qalaýdan bastap, olardyń ashylý rásimine deıin erinbeı qatysty. Bul bireýlerge usaqtyq bolyp kóringen shyǵar, biraq jas memlekettiń jańa elordasyn halqymyzdyń talǵamyn ósirip, talabyn ushtaıtyn, sanasyn serpiltip, mereıin tasytatyn maqtanyshyna, shyn mánindegi súıikti qalasyna aınaldyrý maqsatyn qoıǵan Elbasy úshin memlekettik mańyzy bar másele boldy. Áıtpese, «Astana kelbeti – ult kelbeti» dep aıshyqtap aıtpas edi. «Astana – otanymyzdyń júregi, táýelsizdigimizdiń tiregi» dep tebirenbes edi.
Elordamyz shynynda da táýelsizdigimizdiń tiregine, daǵdarystan alyp shyqqan qasıetti tumaryna aınaldy. Astana qurylysyn bastaý arqyly búkil ekonomıkaǵa jan bitkenin búginde bárimiz moıyndaımyz. Elordanyń arqasynda qurylys ındýstrııasy damyp, ol basqa sabaqtas salalarǵa qozǵaý saldy. El jumyspen qamtylyp, áleýmettik jaǵdaı, jalpy óńirlik aýqymdaǵy demografııalyq ahýal jaqsardy.
Astanalyq degen uǵymǵa saı qala mádenıeti qalyptasty. Jahan jurtyna asa aýqymdy halyqaralyq is-sharalardy – álem memleketteri qatysatyn iri sammıtter men sport jarystaryn ótkizetin, tórtkúl dúnıege tórelik aıtyp, alysty jaqyn, arazdy tatý qylatyn qaıyrymdy qala retinde tanyldy. Álemdi aýzyna qaratqan saıasatkerler, sózi dýaly dinbasylar, óneri asqan sheberler, sańlaq sportshylar tańdaıyn qaǵyp tamsandy.
Astana astana bolýy úshin qajetti negizgi sharttardyń biri – qolaıly kólik-logıstıka júıesiniń bolýy desek, Eýrazııanyń júreginde ornalasqan elorda toǵyz joldyń torabyn túıistirgen megapolıs deńgeıine jetti. Bas qaladan baıtaq elimizdiń barlyq baǵytyna bastaıtyn jáne kórshi eldermen baılanystyratyn, Eýropa men Azııany, Shyǵys pen Batysty jalǵaıtyn avtokólik, temir jol, áýe qatynasy qamtamasyz etildi. Osylaısha Astana tutas Eýrazııa qurlyǵyndaǵy tranzıttik kólik júıesiniń eń mańyzdy bólshegine aınaldy. Osy aıtylǵandardyń barlyǵy jekeleı alǵanda astanalyqtardyń, jalpy alǵanda búkil Qazaqstan halqynyń ıgiligine qyzmet etip jatyr.
Aıbyn Shaǵalaqov,
«Egemen Qazaqstan»
